KAPAMPANGAN KONTRA RECOUNT

Pakiparas ta ya pu karing sablang Kapampangan karing sablang sikoti ning yatu!
Iti pu ing aduan ning kekatamung Indung lalawigan ngening masisibuk ya ing bubut tamu pang demokrasya. Masalang magobra pu ing principal over the principle!
Maliari taya munaman pung apakiprint para abasa de ring alang internet connection. Salamat pu….

ING PAMANALAKARAN DA RING KAPAMPANGAN DIKIL KING RECOUNT A MIYAPAG LABAN KING PINILI DANG MAMUNTUKANG GOBERNADOR

Kayagnan ning pamagpaldas da ring memalen Pilipinu king pangamate nang dating Presidenti Cory Aquino a Indu ning Demokrasya Pilipinas, kasalukuyan da munamang magpaldas ding Kapampangan king maging-alung demokrasya king lalawigan kaibat nang kinampian ning COMELEC at ning Korte Suprema ing sinampa nang PETITION FOR RECOUNT Lilia Pineda laban kang Among Ed Panlilio para mabilang lang pasibayu ring botung atiu karing 4,688 ballot boxes a manibat karing 20 munisipyu at metung a syudad.

Agpang king kampu da ring Pineda, mika maragulan pu kanung kapamiraytan at pamanyaling botu bukud pa king e la mebasa ring botung para karela. Nung ninu ing mayupaya at ating pondung gamitan at kumpletu karing tagabante karing balang presintu, ila pa kanu ring mepirayit at milamangan. Agyang ala mang matibe ebidensya inayunan ning COMELEC at Korte Suprema ing karelang paratang.

Makapagtaka mu pu uling pilan namung bulan bayu eleksyun, bigla neng beligtaran ning Korte Suprema ing keyang sarili at inutus nang sumulung na ing pamamilang pasibayu karing sablang balota king Pampanga.

Migsampa la pung motion for reconsideration ring abogadu nang Among Ed dapot ing lalung makapagtaka, kaibat namu pu ning apat a aldo, mabilis yang mekapagpalual pinal a kautusan ing Korte Suprema para sumulung na ing prosesu ning RECOUNT.

Makapagtaka munaman pu ing mabilis nang pamangimut ning COMELEC kaniting RECOUNT agya mang dapat na nang dinan oras ing pamagsadia king daratang a eleksiun. Imbes na 4, 21 la pung revision committees ding binuo ning COMELEC ban milis yang lalu ing prosesu ning pamamilang. Bayu la pu midala king Manila ding sablang balota mebalu na dakal la kareti ding alang metallic seal at kulang kandadu. Nanu pa pu ngeni ing kasiguraduan tamu king integridad da ring balota?

Itamung Kapampangan maniwala tamu king ulaga ning prosesu ning recount antimong proteksiun ning mesambut a kandidatu nung tutu ya ping mepirayit king bilangan. Dapot e tamu maniwala na atin yang salalayan ing misampang RECOUNT laban kang Among Ed! Ala yang merito ing metung a peke o bogus a RECOUNT!

Ala yang sandata (guns) i Among Ed nune mu ding rosaryu at pangadi da ring tau. Alang ya muring taung pamatakut (goons) nune mu ring taung boluntaryung minapag king karelang sarili, kagiwan at panaun. Lalu neng alang gintu (gold) uling ing sabla piyambag-ambagan da ngan ding taung mignasa king pamagbayu.

Ing kandidatu atin yang upayang manyali nung atinan ya. Makapamirayit yamu nung atin yang makinarya at impluwensya. Kapilan man e menyali i Among Ed uling mabandi yamu king lugud da ring tau. Maimpluwensya ya dapot gagamitan namu iti king ustu at mayap. Bilang paring maniwala king ustu at mayap (pablasang iti ing pekapusu ning darala nang cruzada), kapilan man e na gawan ing mamirayit at manyaling botu ban milukluk yamu king pwestu. E ya kailangan pamatakutan, lokuan, salwan at piraytan ing metung a marangal a Kapampangan a magbotu agpang mu king sasabian ning keyang konsensya. Ninu pu kaya ing mabandi, ating makinarya at impluwensya? Kakadua, ninu pu ing mas ating kapasidad mamatakut, manyali at mamirayit? I Among Ed a alang pibandian, taung babayaranan at makinarya ya pa ngeni ing ating upayang manyali, mamatakut at mamirayit?

Dapot iting RECOUNT ORDER atin yang mas malalam a patuyag - na ding kulang king 220,000 a migbotu kang Among Ed TUNE lang mematakut, menyali at memirayit pablasang abe-abe lang miyambagan, kinimut at migsakripisyu para king keyang kandidatura. Ini ing e ra atanggap ding Kapampangan! Aliwa na i Among Ed ing insultuan da keni nune ing marangal a lahi ding Kapampangan! E na ne laban Among Ed ini nune guera da ne ring Kapampangan!

Uling tilutan na ning Korte Suprema ing sumulung ya ing prosesu ning RECOUNT agyang ala yang matibeng panalumpakan ing reklamu, magawa ya iting marok a piyalimbawanan (bad precedent) karing daratang pang halalan at ume misampang kasu – na ring mabandi at maimpluwensya maliari deng kustyunan ing resulta ning bilangan a malinis ban mibaligtad mu ing bunga ning halalan pabor karela. E pu wari ebidensya, at ali impluwensya, ing basehan ning balang desisiun? Nukarin pu ing hustiya keni?

Dapot bakit pu kaya ating RECOUNT agya mang kinopya de mung verbatim o letra por letra ing mesabing petisiun king metung a lugar? Bakit sinampa do ngan ding kasung labag king eleksiun (shotgun approach) laban kang Among Ed?

Malino king kekaming pamangilalala na manibat iniang miglinis ya at pepakit imahe ning katapatan i Among Ed megumpisa ne ing kalbaryu na keti Pampanga. Manibat iniang meging kritikal ne king Arroyo administration at king e mayap nang kararaptanan, manibat iniang pegtapat no ring 500K a tinggap na mismu king Malakanyang, manibat iniang delum nong plunder di Bong Pineda, a asawa nang Lilia Pineda at ding mitatang Lito at Mark Lapid a kaalyansa da ngan ding pamilyang Arroyo, manibat iniang menalakaran ya laban king susulung dang Cha-Cha via Con-Ass, manibat iniang pepakit nang pwedi palang manungkulan alang commission at SOPs karing kontrata ning gobyernu e ra ne papatugutang kinuyug i Among Ed.

Bukud king RECALL, iting RECOUNT metung yamu karing krus a pupusanan ning makatulirang pamuntuk ning lalawigan. Alub da namu apalako de king luklukan na uling masisilo nong masyadu king darala nang sala. Ing masakit ing Korte Suprema, a ausan tamung last bastion of democracy at pagsantungan da ring mayayalipit, meging kasangkapan ya pa kaniting madalumdum a dake ning kekatang kasalesayan anting Kapampangan. Uling dakal pu kaya karing mahistrado likluk no ngan Pres. Arroyo?

Inumpisan de pu king RECOUNT, miras iti king RECALL at iniang alang miliari king RECALL, pepasublian deng mebie ing RECOUNT laban kang Among Ed.

Akakalingwan da pu yata ring manimuna king pangasulung ning RECOUNT na aliwa naman i Among Ed ing karelang lalaparisan. Ing RECOUNT a alang basehan mangabaldugan yang keyalan kagalangan king meging desisiun da ring memalen Pampanga. Ing pekeng RECOUNT daretsahan yang pamagdakurak king demokratikung karapatan at siwala da ring memalen a migbotu king manalakaran dang pamuntuk.

E yo pu sana pangunahan a kaburian ding Kapampangan. E ye pu sana pamilit ing kekayung makasariling interes king pilubluban da ring Kapampangan.

Ing upaya da ring memalen king lagyu ning demokrasya ilang mangaintulid migulis king kasalesayan. Sukat dang tandanan ding manyulung king alang katutuan a RECOUNT, pauli ning tuksu ning karelang katakawan king upaya, na atiu la king maling dane ning kasalesayan.

King KORTE SUPREMA at COMELEC:

LUID YA ING MARANGAL A KAPAMPANGAN!
KAPAMPANGAN KONTRA RECOUNT (K2R)

Source : http://www.blogcatalog.com/search.frame.php?term=fr.+ed+panlilio&id=93f8530413d9bfcedb20a47cd2d2ff4f

Related Article: 

• Governor Ed Panlilio for President?

• TUTULAN ANG RECOUNT NA HINDI MAKATWIRAN AT WALANG BASESAHAN

• Presidentiables Election 2010

• Its about time to have an honest to GODness person who will lead our Beloved Philippines for 2010. 

• Pwede Pala